Хитови од Глорија Гејнор, Дона Самер, АБА, „Би џиз“, Мајкл Џексон ќе бидат изведени на традиционалниот концерт за празникот Василица во Националната опера и балет. Закажани се два концерта – на 12 и 13 јануари од 20 часот, а ќе настапат оркестарот при НОБ и Националниот џез оркестар, домашни и странски солисти.
– На реперторот се најпознатите диско и поп хитови од 70-тите и 80-тите години, период што остави длабока трага во колективната музичка меморија на неколку генерации. Публиката ќе има можност да ги слушне делата на светски признати автори и изведувачи како Глорија Гејнор, Дона Самер, АБА, „Би џиз“, Мајкл Џексон и многу други, но низ симфониски аранжмани што ја прошируваат нивната оригинална форма и ги поставуваат во контекст на современа концертна естетика – велат од НОБ.
Тие додаваат дека овој уметнички пристап не претставува само носталгично враќање кон музиката од минатото, туку и нејзино творечко преосмислување. Концертите насловени „Диско вечер“ создаваат мост меѓу жанровите, генерациите и музичките традиции поврзувајќи ја популарната култура со институционалната сцена на класичната музика.
– Оваа синтеза ја нагласува отвореноста на македонската Национална опера и балет кон современите културни текови и нејзината мисија да понуди програми што се истовремено квалитетни, иновативни и достапни за пошироката јавност – додаваат од НОБ.
Ќе настапат домашни и странски популарни пејачи, Оркестарот на македонската Национална опера и балет, како и Националниот џез оркестар, соработка што дополнително го збогатува звучниот спектар на концертот и внесува динамика, ритмичка разноликост и современа интерпретативна енергија. Се очекува спојот на класични, џез и поп елементи да ја направи „Диско вечер“ уникатно концертно искуство кое го надминува жанровското ограничување и ја афирмира музиката како универзален јазик.
Билетите се во продажба на линковите: 12 јануари и 13 јануари.
